«Спомний собі Лемку» – ІІ част бесіды з Анном Поручник з Білцаревы – четвер, 21.00 год.

В остатнім одтинку «Спомний собі Лемку» стрітили сме ся з Анном Поручник (з д. Федорчак), котра народила ся в 1926 р. в русиньскым селі Білцарева на західній Лемковині. Днес, о 21.00 год. за лемківскым часом зас завитаме до Чмеля на Нижнім Шлеску, де по выгнаню в 1947 році прожыват п. Поручникова.

В І части нашой сериі бесідували сме м.ін. про щестливе жытя дома, неспокійний час неодолга по закінчыню войны, аж вкінци про злочын выгнаня сорок семого рока.

Днес почуєте слова, котры уж рідко хоснуєме. Стародавне назовництво зіля, квітя ци лахів з лемківской шафы, для нас – слухачів радия лем.фм – сут доказом великой вартости і богатства русиньского языка.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу. Сес проґрам то поворот до втраченого лемківского щестя.