«Мотыв з Підкарпатя» – конкурс на взір

Карпатска Фундация – Польща запрашат взяти участ в загальнопольскым конкурсі пн. «Мотыв з Підкарпатя» на реґіональний взір. На лавреатів ждут грошовы нагороды. Пропозициі прац мож присылати до 24. лютого/фебруара т.р.

Орґанізаторы заохочают ґрафіків, проєктантів, народных творців, ремісників та вшыткых заінтересуваных підкарапатскым взірництвом взяти участ в конкурсі. Пропозициі можут мати форму цифровых ґрафік, але тіж вшелеякого фізычного рукоділа. Можут то быти взоры і орнаменты оперты на традицийных, історычных, реґіональных мотывах з підгірскых обшыри підкарпатского воєвідства, або выдуманы чысто однова, перетворены, але інспіруваны місцевым дідицтвом взоры. Присланы проєкты оцінювало буде штыріособове жырі, котрого склад познаме по закінчыню конкурсу. Перша нагодора то 1500 зл нетто, а выріжніня – 500 зл нетто. Оголошыня нагородженых і выріжненых пройде до 30. марця т.р.

Вшыткы працы будут схоснуваны до створіня книжковой версиі альбому, презентуючого богатство підкарпатского взірництва. Альбом буде тіж промувал реґіон і творців.

Конкурс єст єдным з промоцийных діянь Аґенциі Промоциі Гірскых Обшыри Підкарпатя в рамках проєкту Альпы Карпатам, реалізуваного Карпатском Фундацийом – Польща, фінансуваного Швайцарийом.