Вмер Михал Яґєлло – альпініста, писменник, публициста

1. лютого 2016 рока вмер Михал Яґєлло, польскій писменник, альпініста, публициста, поета, вельолітній директор Народовой Бібліотекы і віцеміністер культуры, был полномічным премєра Влодзімєжа Цімошевіча дс. нацийональных меншын. Вмер наглі, нич не заповідало його смерти.

Михал Яґєлло вродил ся 23. серпня/авґуста 1944 рока в Яніковицях, селi на схід од Кракова. Скінчыл польску філолоґію на Ягайлоньскым Університеті. Окрем літературы, залюблений был в горах. В роках 1964-1974 жыл в Закопаным, де в рр. 1972-74 был начальником Татряньской Ґрупы GOPR.

В 1975 році перенюс ся до Варшавы. Был заступцьом кєрівника выділу культуры KC PZPR. З партиі одышол по оголошыню воєнного стану. В 1989 р. остал віцеміністром культуры і тоту функцию выполнял вісем років.

М. Яґєлло был заінтересуваний вельокультуровістю давной і сучасной Польщы. Особливі близкы были му справы польской культуры за границьом та культуры інчых наций – лемківской, украіньской, білоруской, ромской і литовской в Польщы. Выдал збірник есеів Партнерство для будучности. Ескізы о східній політыці і нацийональных меншынах. Бесідувал, же неє великой вітчызны без пошаны для малой вітчызны. Парунадцет років вюл занятя з предмету «Нацийональны меншыны в Польщы» в Інституті Польской Культуры Варшавского Університету. Од червця/юнія 1998 рока до червця/юнія 2006 рока шефувал Народовій Бібліотеці в Варшаві, де м.ін. заініциювал цикль выстав Нашы сусіды – нове пізрізня.

Подля М. Яґєллы, в нашых часах о нацийональній приналежности рішат лем субъєктывна свідоміст заінтересуваной особы. Тота свідоміст істнує, тырват або заникат лем в головах поєдных люди, а познаєме єй на основі свобідной деклярациі самых заінтересуваных.

Публикувал повісти, оповіданя, есеі, ескізы, поезию. Был вельократні нагороджаний, м.ін. ордером св. Маріі Магдалины, признаваным Православном Церквом в Польщы, за опіку над церковныма забытками.