За нами перше спільне засіданя зарядів Стоваришыня Лемків і Руской Бурсы

В суботу, 23. січня/януара 2016 р., одбыло ся в Ліґници спільне засіданя зарядів Стоваришыня Лемків і Стоваришыня Руска Бурса. Хоц спілдіяня обох орґанізаций фунґує од початку 90. років ХХ ст. в вельох просторах – то перша в істориі того рода офіцияльна стріча. Ініцияторком такой формы была др габ. Олена Дуць-Файфер, цілю, як писали сме на нашым портали, підсумувати, омовити і представити деякы проблемы, в якых оба стоваришыня ся не сходят, та запропонувати спосіб іх спільного вырішаня на будуче. Обі орґанізациі поважні підышли до пропонуваной формы стрічы, што видно было в высокій фреквенциі – присутных было 9/13 членів заряду Стоваришыня Лемків і 5/6 членів заряду Стоваришыня Руска Бурса.

На засіданю представлено загорозы, перед якым стоіт в нашых часах лемківскє середовиско. Посеред них нашли ся проблемы, котры навязуют до діяльности орґанізаций, зверха прібуючых выглядати як лемківскы, ачий называти ся лемківскыма, але не потверджаючых того ани в діяню (хоц часто го фарбуют, называючы лемківскым), ани в записах своіх статутів, а придавник лемківскій потрібуют такой лем до внескуваня о державны грошы. Така ситуация выкликує небезпеку іщы більшой як дотепер асиміляциі, або вынародовліня, пропонуючы Лемкам альтернатывний підхід ґу лемківскій достоменности, прото заряды обох стоваришынь на суботнім засіданю міцно занеґували такы діяня та підкрислили свою приналежніст до русиньского напряму, потребу єй плеканя і спілістнуваня з цілым карпаторусиньскым рухом.

Дискусия вошла тіж в обшыр медий, інфомуваня та атаків і фалечности, котры ідут зо стороны фарбуваных на лемківскы часописів, ци другых ініциятыв, шумні называных радийом. Шефредакторы радия лем.фм (Богдан Ґамбаль) і порталю лем.фм+ (Демко Трохановскій) підкрислили потребу скорой реакциі на такы діяня і взаімну підпору обох орґанізаций, понеже в простір інтернету, як і традицийных форм публицистыкы, входит штораз більше неправды і гейту, на котры нихто не реаґує. При нагоді бесіды о медиях, заряды СЛ і РБ рішыли, же вшыткы подіі нима фірмуваны або орґанізуваны, будут мати медияльну підпору і патронат лем.фм, котре на міру своіх можливости буде нажыво трансмітувало тоты подіі в своім радию, што переложыт ся на іщы більшу промоцию тых акций во світі.

Важным пунктом стрічы была бесіда над покликаньом асоцияциі лемківскых орґанізаций, котра мала бы быти дискусийном плятформом і політычном репрезентацийом Лемків в Польщы. Того рода тіло істнує на Словациі (Округлий Стіл Русинів Словациі), котре запрашат до себе як члена не лем зареґіструваны общества, але і фізычны особы – выдатны персоны русиньского культурного і соспільного жытя, як і представників грекокатолицкой і православной Церков. То важна інституция, котра выдає опініі, рекомендациі, або вызначат пріоритеты діянь в русиньскій обшыри.

Першы крокы ґу покликаню такой формы спілдіяня уж за нами – СЛ і РБ вызначыли по 2 особы до прац над кодифікацийом обшыри і способів діяня асоцияциі, котры на наступным плянуваным спільным засіданю (а така явила ся інтенция участників – реґулярны стрічы обох зарядів), по консультациі в своіх орґанізациях, буде мож приняти як реґулямін новопокликаного тіла.

Дальшом темом были контакты орґанізаций і іх діяльніст в інтерреґіональным вымірі. Омовлено актуальну ситуацию Світового Конґресу Русинів, до котрого приналежыт Стоваришыня Лемків, і його президиі – Світовой Рады Русинів – діючой в його імени помедже конґресами. Члены Руской Бурсы выразили свій непокій в звязку з браком буд-якых інформаций на тему діяльности СКР і зо свойой стороны попросили ведучого СЛ, жебы на наступне засіданя принюс більше інформаций о актуальных працах СКР.

Суботнє засіданя было важным в істориі пунктом для Русинів в Польщы. Підняты рішыня, покликаны робочы ґрупы і деклярация близшой постійной спілпрацы в духу зрозумліня та взаімной піпдоры напевно буде мало переложыня на іщы більшу промоцию Лемків і противдіяня асиміляцийным процесам, з котрыма змагаме ся наштоден.