Скінчіли Інтернетовы новинкы АРКСР

Як на сайті Інтернетовых новинок Академії русиньской културы в Словеньскій републіці інформує шефредактор Александер Зозуляк, новинкы ку кінцю рока 2015 скінчіли свою діяльность. Выходили од 2009-го рока.

Зозуляк пише, же рік 2015 быв про редакцію інтернетовых новинок АРКСР дотеперь єдным із найтяжшых на їх приправу і выробу, главно односно мізерной штатной дотації. „В новім році уж інтернетовы новинкы Академії русиньской културы в СР не будуть выходити. Намісто того будеме дале продовжовати у розвитку нашой вебовой сторінкы під таков самов назвов, вкладаньом до окремых єй рубрік найінтереснішых і найважнішых справ з історії і сучасного културно-сполоченьского жывота Русинів. Самособов, то є наш план, але ці досправды будеме продовжовати у розвитку нашой вебовой сторінкы www.rusynacademy.sk, то буде залежати на схваліню і запропонованю належной штатной дотації фаховов комісійов про русиньску народностну меншыну при Уряді  уповномоченого про народностны меншыны Влады Словацькой републікы, як і на рішіню спомянутого уряду,“ інформує далше Александер Зозуляк.

АРКСР взникла у 2005-ім році в рамках Світовой академії русиньской култлуры, котру у 2002-ім році засновав Штефан Чепа як академічну і харітатівну інштітуцію із цільом стімулації новой роботы і всокочіня богатства на хосен цілого людства. Інтернетовы новинкы зачала АРКСР выдавати у 2009-ім році як тыжденник.

На початку мали новинкы три языковы мутації. Выходили в русиньскім, словацькім і анґліцькім языках. Із причіны все низшой державной дотації поступно словацька і анґліцька языковы мутації перестали выходити і зістала лем русиньска верзія, де з часу на час появили ся статі по словацькы. Остатня дотація на 2015 рік про Інтернетовы новинкы АРКСР была у вышці 1000 €. Академія жадала про фунґованя новинок суму 4860 €. Рік передтым были новинкы підпорены лем сумов 500 €, причім было жаданых 5700 €.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА