В суботу одбуде ся засіданя ОСРС

В суботу 16-го януара 2016 р. одбуде ся в Пряшові вже 17-те засіданя Округлого стола Русинів Словеньска (ОСРС).

Одкрыта русиньска платформа, котра зъєдинує русиньскы обчаньскы здружіня, професіоналны русиньскы інштітуції і індівідуалных русиньскых актівістів, має на суботу у своїм проґрамі окрім іншого три важны пункты.

Ґрекокатолицькый священик отець Марош Прейса, котрый є представительом Ґрекокатолицького архієпіскопства в Пряшові при ОСРС, буде участных інформовати о можливостях зряджіня русиньской єпархії на теріторії Словакії з погляду Кодекса канонів выходных церьквей – канонічного права выходных католицькых церьквей.

Мілан Піліп, котрый є секретарьом ОСРС і членом Выбору про народностны меншыны у етнічны ґрупы за русиньску народностну меншыну, буде інформовати о конференції ку приготовльованій пропозіції народностного закона, на котрій робив ОСРС під веджіньом ґаранта Андрія Ліґы, сучасного председы ОСРС.

ОСРС так, як і минулого рока, проїднать і русиньскы пріоріты про підпору із дотачной сістемы Уряду Влады Словацькой републікы під назвов Култура народностных меншын 2016. Схвалены пріоріты будуть загнаны членам комісії, котра буде рішати о проєктах поданых за русиньску народностну меншыну.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА