В музею Варгола мож видіти далшы унікаты

Як сьме вас інформовали і на нашім порталі, 11-го децембра 2015 р. проходила в єднинім в Европі і другім на світі Музею модерного уменя Енді Варгола в Міджілабірцях інавґурація далшых 26-ох унікатных творів в цілім світі знамого умелця, котрого мено має і музей. Дакотры із них суть на теріторії середньой Европы першыраз.

В музею суть по інавґурації выставлены образовы серії і індівідуалны образы. Тоты походжають із дакілько ґалерійных і пріватных збірок і представителі музею інформовали, же бы могли в Міджілабірцях быти выставлены аж пять років. Высоку вартость має і то, же образы, котры творять серії, мають індентічны чісла.

В музею мож теперь видіти серію Свята Аполонія, дві серії, котры походжають із цікла Владарькы – портрет недерландьской кральовной Беатрікс і свазійской кральовной Ніомбі Твала. Тоты три серії мають по штири образы. Остатня серія, котра обсягує вісем образів, є творена Варголовыма творами із цікла Квітя (чорно-біла).

В музею мож видіти і портрет гокейовой леґенды, в тім часі молодой гокейовой звізды, Вейна Ґрецького. Ексклузівітіов є на тім портреті тото, же портрет має гокеїстово сіґнованя. Портрет Едворда Кенедія є доповненый о додаток „de luxe“, бо на портреті є діамантовый порох.

Найціннішыма з нововыставльованых творів суть портет другой жены колишнього нюйорьского ґувернера Нелзона Алдріха Рокефелера – Марґареты „Happy“ Рокефелер, но і єден із двох образів унікатной серії Кральовна Елізавета ІІ. Унікатность образу є в тім, же другый із серії счезнув.

Музей модерного уменя Енді Варгола выникнув в Міджілабірцях зачатком 90-тых років 20-го столітя. Моментално музей выставлює 170 творів Варгола.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА