700 років села Камюнка

В пятницю, 18. грудня/децембра, зачали ся празднуваня в селі Камюнка на Пряшівскій Руси, котры проходят з нагоды 700. річниці од дня першой писаной змінкы про село. Перша інформация про Камюнку походит з 1315 рока, што зачыслат Камюнку до єдного з найстаршых рускых сел в тамтым реґіоні.

Проґрам празднувань річниці основаня села є розтягнений на долший період, понеже буде тырвал до 23. квітня/апріля 2016 рока, коли одбуде ся Ден села Камюнка. До того часу в селі будут проходити і другы подіі, м. ін. волейбольовий турнір, дни русиньскых звыків і традиций села Камюнка, пущаня, настольнотенісовий турнір і марш на нартах по камюньскых стежках.

Більше інформаций – долов на заміщеным афішы.

Камюнка то русиньскє село на Пряшівскій Руси, котре находит ся в окресі Стара Любовня. Перша змінка про село походит з 1315 рока. Днес село чыслит близко 1370 жытелів, з чого велика більшіст то Русины, котры приналежат до місцевой грекокатолицкой парафіі свв. Петра і Павла, в котрій находит ся церков з 1790 рока. Настоятельом Камюнкы од 2006 рока є о. Франтішек Крайняк – выдатний Русин, тлумач сучасных церковных текстів на русиньскій язык (м.ін. Тетраєвангелия, Малий Требник). В селі фунґує ансамбль Барвінок, котрий гостил на ріжных русиньскых фестівалях м.ін. в Польщы. Камюнка то єден в векшых центрів русиньской культуры на Словациі.