„Руска матка“ має 25 років

Як інформує аґентура Рутенпрес, в неділю 20-го децембра 2015 в Руськім Керестурі будуть проходити святкованя із нагоды 25-той річніці заснованя орґанізації Русинів Войводины „Руска матка“. Подія із културным проґрамом одбуде ся в містнім Домі културы і зачаток має о 16.00 год.

„Руска матка“ є добровольным обчаньскым здружіньом, котре пропаґує і підтримує културный жывот і розвиток войводиньскых Русинів. Наперед была заснована у 1945 році і в тім часі намагала ся фінанчно підтримовати бідных штудентів, выдавала популарно-освітні публікації і обще пропаґовала Русинів і їх войводиньску варіанту русиньского языка. Головный центер „Руской маткы“ быв у Руськім Керестурі, де орґанізація мала і свою друкарню. Окрім того мала 12 містных орґанізацій в містечках Войводины і Сриму. Орґанізація перестала існовати у 1948 році. Діяльность была заказана, як і іншым русиньскым орґанізаціям в іншых комуністічных державах в тім часі, режімом, кідьже „Руска матка“ не прияла україньску орьєнтацію.

Орґанізація обновила ся у 1990 році в Руськім Керестурі. Їй формалне обновліня было при нагоді 250-го юбілею переселеня Русинів до Войводины, на теріторії днешньой Сербії і Хорватії. „Руска матка“ є єднов із основаючіх членів Світового конґреса Русинів і членом „Maison des Pays” – орґанізації бездержавных народів.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА