На Словакії засідала языкова комісія

За інформаціями Інтернетовых новинок Академії русиньской културы в Словеньскій републіці дня 20-го новембра 2015 р. ся в просторах Інштітуту русинького языка і културы Пряшівской універзіты в Пряшові одбыло перше тогорічне засіданя узшого кругу языковой комісії, котрого склад творили проф. ПгДр. Йосиф Сіпко, к. н.; доц. ПгДр. Василь Ябур, к.н.; доц. ПгДр. Юрій Панько, к.н.; доц. ПгДр. Анна Плішкова, ПгД.; ПгДр. Кветослава Копорова, ПгД. і Мґр. Зденка Цітрякова.

Засіданя комісії, як інформують Інтернетовы новинкы, реаґовало на заключіня Міджінародного конґресу русиньского языка, котрый проходив в Пряшові в септембрі того року, і першов стрічов ся має зачати приготовліня матеріалів на корекцію в правилах правопису, якы будуть  в половині будучого рока представлены на засіданях шыршого кругу языковой комісії.

До шыршыго кругу языковой комісії были закликаны актівны хоснователі русиньского літературного языка в окремых сферах його фунґованя – представителі русиньскых медій, театру ітп.

Далше засіданя є плановане на місяць фебруар 2016 р. і членове комісії на нього мають приготовити свої коментарі ід пропонованым змінам. Членове приготовлять і далшы матеріалы на корекцію правил правопису. О засіданю інформовала Зденка Цітрякова, членка языковой комісії і докторандка на Інштітуті русиньского языка і културы Пряшівской універзіты в Пряшові.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА