ТАД приготовлює „Фантазію“

Театер Александра Духновіча в Пряшові – единый на світі професіоналный русиньскый театер, приготовлює у своїй юбілейній 70-ій сезоні свою другу премєру, котров буде твор „Фантазія“ Козьмы Пруткова. Режії ся тот раз в театрі хопив Светозар Спрушаньскый, котрый з театром співпрацовав вже на дакілько пєсах.

Пруткова Фантазія є легоньков комедійов зо співанками. Публіка ся буде коло позераня на ню файно забавляти. А нелем тото! Козьма Прутков (леґенда, но вєдно з тым выдумка і фікція) – в реалности Алексей Толстой і Алексей Жемчужников, написали „vaudeville“ Фантазія із ясным заміром: пародованьом того жанру высміяти ся туньому смаку втогдышньой сполочности. Криве дзеркало того твору і днешній публіці вказує то, што денно конзумують. Річі і творы, котры го вже ани не бавлять або бы го бавити не мали. Бо іде о бесцінну забаву і ґіч. Пєса такы творы нелем зосмішнює, але ся односно них і крітічно вставлять. Кладе вопросы: У якім світі то днесь жыєме? У світі досправдовых вартостей або повсякденной поверьхности? Існує іщі уменя, або лем його карікатура? Обколесує нас ґіч – в чінах і думаню? На чім ся іщі (або вже лем?!) в театрі докажеме забавляти? І о тім є кекешна, делікатно себепародічна, но все іронічна театрална комедія із пера російского класіка.

Премєра Фантазії в Театрі Александра Духновіча в Пряшові одбуде ся дня 11-го децембра 2015 р. о 19.00 год. на Великій сцені.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА