Зміны в єпархіях, котры обнимают Лемковину

Як заявлят офіцияльний сайт ПАПЦ, постановом Св. Собору Єпископів Польской Автокефальной Православной Церкви з 17. листопада/новембра 2015 р., рішено, же з причыны планного здоровля владыкы Адама – архієпископа перемышльско-новосандецкого, єпархію тымчасово обыйме владыка Паісий, єпископ ґорлицкій. Полний зміст приведеного комунікату чытайте за тым мотузком.

10 днів перше деякы зміны прошли в грекокатолицкій перемышльско-варшавскій архієпархіі. 7. листопада/новембра т.р., враз з 75-літьом митрополиты Йоана (Мартиняка), што за канонічным правом Католицкой Церкви означат граничны рокы справуваня уряду, Ватикан повідомил о принятю резиґнациі владыкы з митрополичной функциі. В комунікаті чытаме тіж, же папа Франтишок призначыл єпископа Євгена (Поповича), вікария перемышльско-варшавской архієпархіі, архієпископом той же єпархіі і митрополитом. Торжественний чын введіня на митрополичний престіл владыкы Євгена одбуде ся 19. грудня/децембра 2015 р. в катедральным соборі св. Йоана Крестителя в Перемышли, на котрым свою участ заповіл Верховний Архієпископ Кыівско-Галицкій – Святослав (Шевчук), предстоятель Украіньской Грекокатолицкой Церкви. Більше –  за тым мотузком.

Так православна перемышльско-новосандецка єпархія, як і грекокатолицка перемышльско-варшавска архієпархія, свойом юрисдикцийом обнимают територию Лемковины. Русины з той части Карпатской Руси приналежат головні до Польской Автокефальной Православой Церкви і Украіньской Грекокатолицкой Церкви.