«Спомний собі Лемку» – І част бесіды з Укачом Вожняком про дітиньство на Лемковині і період выселінь – віторок, 20.00 год.

Днес в проґрамі «Спомний собі Лемку» запрашам до выслуханя І части бесіды з Укачом Вожняком, котрий народил ся в 1937 році на західній Лемковині, в селі Білцарева – славным під взгядом выходячых одтамале выдатных Русинів. Окрем споминів рідного села, його істориі, оповіст нам тіж про своі дітячы рокы, пережытя звязаны з неспокійным періодом ІІ Світовой Войны та выгнаньом в 1947 р.

Укач Вожняк то культурний діяч, долголітній член Стоваришыня Лемків, перший, а такой єдиний дотепер учытель лемківского языка в Ліґници і околицях (за тым мотузком можете послухати інтервю Б. Ґамбаля власні про вчыня языка). В свобідным часі дописує до часопису «Бесіда» і «Лемківскых Річників». Якісий час тому в «Бесіді» вказал ся цикль його споминів про рідне село і жытя по выселіню. Знаме, же думат над печатаньом книжкы авторства свого няня Владиміра Вожняка, котрий списал традицийне білцарівскє весіля, а – будучы вельо разів весільным старостом – знал іх барз добрі.

«Спомний собі Лемку» то проґрам, в котрым можете почути цікавы річы про минуле, про рідну Лемковину, але і жытя на чужыні. Інтервю ведены молодым чловеком, дают надію старшым його бесідникам на ліпше заран для лемківского народу.