Гыбридa

Раз

Повселюдний спис є од антычных часів придуманий як прецизийний інструмент, котрого задачом є принести полны і детальны інформациі про населіня краю, його територияльне розміщыня, про демоґрафічну і професийну структуру соспільства, економічну характеристыку ґаздівства і родин, до того про материяльний быт громадян і засобы хыж. Дотримуючы медженародовых законів, в державах Евросоюзу, в 2011 році, проведений был спис. В Польщы прошол нетрадицийні. Анкєтеры не входили до каждой хыжы і не жадали од вшыткых одповіди на списовы звіданя. Презес Головного Статистычного Уряду (ГСУ) рішыл, што спис буде переведений хоснуючы мішану, гыбридову методу, т.є. хоснуючы інформацийны системы державной адміністрациі і даны, котры будут зобраны в полній анкєті (традицийном методом) на выбраній репрезентатывній пробі соспільства, і в самосписі. Мож было самому ся списати на портали ГУС.

В списі з 2011 рока найбільше важне было отриманя інформаций на вопросы, котры дали бы урядови і дослідникам можливіст порівнань даных з попереднього спису з 2002 рока. Такє понавляня списовых звідань є необхідне до ведіня порівнавчых аналіз соспільных процесів, котры проходят в часі і до опису змін, котры ся объявили в демоґрафіі і економіі  обшыри населіня, хыж і родин в повязаню з господаруваньом в державі. Єдным з вопросів, котры згідно з законом мусят быти списово досліджаны єст тот демоґрафічний, в однесіню до нацийональной самоідентифікациі гормадян. В польскым списі з 2002 рока мож было одповісти на звіданя – з якым народом респондент ся ідентифікує. 5.850 з них одповіло ясно, што з лемківскым. З ниякым інчым, лем з лемківскым народом. Але тото ясно зрахуване чысло было контестуване. Урядникы міністерства властивого до справ меншын повідали, же і некотры Украінці не за добрі зрозуміли, о што анкєтер звідує і зробили хыбу. Пописали ся за Лемків, не за Украінців. І было такых «непонятных» Украінців рівно половина. 2925 особників, котры были неуважны і записали ся Лемками. Подібно были в тій справі зрыхтуваны і експертизы з точным розрахунком, але николи не были они вказаны. Зато міністер властивий до справ меншын на репрезентантів Лемків покликал єдну Лемкыню і єдного Украінця. Придумал зробити гыбридову репрезентацию. Згідно з польскым законом про меншыны міг покликати на репрезентанта Лемків кого бы захотіл. Міг покликати і Ескімоса. На жаль не покликал.

Секретне чысло нерозумных Украінців записуючых ся за Лемків остало здеконспіруване в переписі в 2011 року. Основны заслугы до познаня польскых державных секретів в меншыновых квестиях мала Олена Дуць-Файфер лемківска репрезентантка комісиі. Запропонувала она, жебы в списі з 2011 рока звідати ся по двакрат, як вшыткым ся наперед здавало, о тото само. По перше – з яком нацийом ся звідуваний ідентифікує? А дале, жебы вшытко было ясне, і жебы тоты, котры за першым разом не зрозуміли, або не дочули, мали другу шансу одповісти – А до якой іщы нациі ся признают? Олена Дуць-Файфер поясняла, же сут зложены, гыбридовы достоменности, неєднозначны ідентифікациі, мішаны етнічні супружа і діти, котры ся в такых супружах народили. Такы припадкы мали обнимати придуманы два звіданя, котрых задачом было подвійну ідентифікацию зрахувати.

В реультаті повселюдного спису з 2011 рока в Польщы зявило ся чысло праві 11 тисячів Лемків (до той ґрупы зарахувано тых, котры ся окрислили і як Лемкы, і як Полякы), і точно – 283 Лемків, такых, котры чуют приналежніст і до украіньского народу.

Два

Война, котра проходила од 2014 рока на Украіні войсковыма експертами і журналистами была окрислена, як гыбридова. Дефініює ся так властиві стратеґію, котру хоснуют стороны конфлікту. Гыбридова война то получыня конвенцийональной войны, веденой, од часу од часу, при хоснуваню ріжных деструкцийных елементів, не лем мілітарных. Такій конфлікт проходит без офіцийного оголошыня і єст міцно зложеным, покомплікуваным процесом. Хоснує ся в ним і елементы дезінформациі, провокациі і цибератаків. Серед чысленных реальных фронтів украіньской войны сут тоты, котры вытворили сами украіньскы власти і украіньскє соспільство. Прикладом того єст справа закону «про принципы державной языковой політикы», так званий закон Колесниченкы-Ківалова. Єдным з першых рішынь революцийной украіньской верховной рады было скасуваня можливости хоснуваня нацийональныма меншынами своіх языків. Тото дискримінуюче меншыны рішыня было одраз неґатывно приняте державами ЕС, і примусило украіньскы власты до выцофаня ся з нього. Президент Порошенко каял ся, што Украінці штоси попутали і просят другу шансу.

Цілий сценарий з пляном взможыня дискримінациі на Украіні меншыновых языків был для мене так неповірительний, як бы был  придуманий не в Кыйові, лем на Лубянці. Несподівано для векшыны депутуваных до верховной рады, ефектом антиросийскых намагань было остуджыня проукраіньскых поглядів в державах ЕС.

Але дале на ґамбокнижковых ґрупах, тых, на котрых раз за час заміщаны сут і інформациі, котры тыкают ся Лемків, Русинів, то єст бездержавной нацийональной меншыны, вызнаной вшыткыма европейскыма державами і Сербском Республиком, а не вызнаваной Украіном, зъявили ся мотузкы, під котрыма мож підписати дві електронічны петициі до украіньского президента.

Перша (№22/001799-еп.) є закликом неякого Ігоря Лазаренкы – «о позбавліня громадяньства осіб за сепаратизм». До 15. листопада 2015 рока його петицию підпорило 19 522 Украінців. Пан Лазаренко жадат такых змін в украіньскій конституциі і законах, котры сотворят можливіст одбераня громадянства тым, котры публичні высловлюют, ци пропаґуют «злочынний сепаратизм», порушыня територияльной цілости і суверенности Украіны. За слова мало бы быти одберане украіньскє громадянство. Тоту петицию пошырюют в інтернеті і особы русиньского походжыня, котрых предкы легко сами в 1945 р. вызбыли ся польского, ци чехословацкого пашпорту.

До головы одраз пришли мі два подібны «правны» розвязаня. Перший то норимбержскы законы Nürnberger Rassengesetze, схвалены в Німцях в 1935 році. Пакєт принятий гітлерівскым рейхстаґом, составлений был з трьох шумні названых законів – о громадянстві Рейху, о охороні німецкой кырви і німецкой чести, наконец – про барвы і фану Рейху. Норимбержскы законы дозволяли заберати Жыдам, Циґанам і Муринам громадянство, маєткы і правну охорону.

Інчы припадкы подібных до украіньскых жаданых рішынь розограли ся в Полщы. Перший раз декретaми з 1947 р. В акциі Вісла, Лемкы, Русины были выняты спід права. Позбавлено іх громадскых прав, маєтку, чести і выгнано. Як писал поета «Лемко был вартий тілько, што старий чайник». Другій раз в 1968 р. в рамках антижыдівской гістериі позбавлено пашпортів, польского громадянства і примушено до еміґрациі праві 15 тис. громадян жыдівского походжыня, в тым вызначных професорів.

Проєкт Украінця Лазаренкы, пошырюваний в інтернеті, пропонує нич інче, як законы, котры світ уж виділ за часів урядів, справуваных нацийональсоциялистами і нацийональбольшевиками. Неприпадком оба згаданы політычны системи были гыбридовы.

Три

Гыбрида, то амальґамат, результат природного, або штучного крижуваня медже двома ріжныма орґанізмами. Окрем того, тот термін односит ся до мішаня популяций, рас, родів або культур рослин, ци звірят. Приняло ся хоснувати гыбридизацию в зоотехніці, аґрономіі і ґенетыці.

Політычна гыбрида то злучыня двох протиставных і выключаючых ся –  товды, коли функцийонуют в оддільній формі – політычных думок, або ідеолоґій. Примірами такых ідей сут нацийональний социялізм, аґрарний социялізм, ци розвиваний в бывшых комуністычных державах -нацийоналістычний большевізм. Лазаренко і його файта здає ся не знати, же політычны гыбридовы ідеолоґіі были уж скорше Украінцями розвиваны. Не думам, жебы в ЕС перешла акция одбераня анґлицкых пашпортів Шкотам, фіньскых – Шведам, словацкых – Мадярам, ци іспаньскых – Катальончыкам, хоц жадают они або незалежной державы, або автономіі. На Украіні тоталитарны, шовіністычны ідеі фурт находят вельо прихыльників. Зас можу скоментувати, же єст тото неповірительне. І што робит достовірныма росийскы інформациі в справі розвитку профашыстовскых і антидемократычных поглядів і рішынь на Украіні. Тото доказує, што гыбридова война має вельо сторін.

Ґенетычне крижуваня рослин і звірят мало бы сотворити роды, котры были бы позбавлены ґанчів, несеных первістныма объєкатами. З получыня в гыбриду мали бы выникнути творы, котры перенесут лем позитывны прикметы. Рідко маніпуляторам ґенами, родами, ци ідеолоґіями ся поведе сотворити новий ліпший быт. Найчастійше творят монструм, потвору, котра родит лем страх, аверсию, або зло.

Коли Лемкы, Русины декляруют, же не хотят ся асимілювати, лем намагати ся надале цінити си і розвивати свою культуру, літературний язык, обычай, і вшытко тото, з чого сопоставлена є нацийональна русиньска достоменніст, не повинны дозваляти ріжным псевдоґенетыкам на вводжыня до лемківства своіх маніпуляций. Мішаня Лемків з другыма народами і чужом ідеолоґійом, котра до того не вызнає Лемків, Русинів за нарід, то діяня антилемківскы. Творят гыбриду, котра, коли оставлены має ґены чутливости – терпит. А коли іх не мат, приносит лем ганьбу свому родови. Пора, прото, скінчыти з украінізацийныма експериментами, котры явно підпорюют тых, котры вельо разів вказали своі облича і формациі, з котрых пришли. Хоц бы на порушуючій право передсписовій украіньскій пропаґанді, накєруваній до Лемків перед списом в 2011 р.

Друга петиция (№22/013464-еп.)  до украіньского президента записана Юрийом Проданом, предсідателом Закарпатского Областного Науково–Культурного Товариства ім. Александра Духновича, заохочат вшыткых Лемків, Русинів світа до жаданя признаня Русинів корінным народом на Украіні. Тота петиция не отверат ниякого фронту войны. Єст лем закликом до приверніня справедливости, порушеной тоталітарныма гыбридовыма ідеолоґіями. Доднес підписали тоту петицию 103 особы на вымагане мінімальне чысло 25 тисячів. І я бы-м єй радо підписал, лем при верифікациі мусіл бы-м подати чысло украіньского пашпорту. Дотля го не мам, і якоси не єст мі з тым планно.

В проґрамі вызвучалa співанка дуету Yazoo «Don’t Go», фото горі: кадр з фільму «Фраірка Франкенштейна», з 1935, джерело – вікіпедия.