Нова платня ансамблю «ЛемОН» уж в продажы!

Днес 13. листопада/новембра 2015 р., а то значыти може лем єдно – ансамбль «ЛемОН» офіцияльні презентує свою нову платню пн. “Etiuda zimowa”!

Заявлялми сме о тым скорше, же такій ден надыйде, а днеска можете уж придбати речений альбом. Лідер ансамблю, Ігор Гербут, подібні як в попередніх двох альбомах і тепер постарал ся о тото, жебы на новым кружку його ґрупы нашли ся творы в лемківскым языку! Старчыт лем припомнути, же скору і успішну карєру «ЛемОН» зачал од новаторскых аранжаций, співаных по лемківскы. Од тамтого часу є великым амбасадором лемківского языка, культуры, традициі, істориі не лем в Польщы але і на світі. Ігор Гербут, вєдно з цілым ансамбльом «ЛемОН», бере участ в ріжных музычных проєктах та телевізийных і радийовых проґрамах, де, окрем музычной діяльности, все старат ся підкрислити, же іх ансамбль то ґрупа люди ріжных народности – Лемків, Украінців і Поляків. Сам лідер ґрупы уж од долшого часу выступує на сцені з лемківском фаном.

Нова платня своім наголовком навязує до зимовой поры рока, а то значыт, же находят ся на ній і святочны творы – коляды і різдвяны пісні, разом 11 творів по лемківскы, украіньскы і польскы. Зо знаных Лемкам коляд, Гербут выбрал м.ін. Тиху ніч ци Добрий вечер Тобі (демо до послуханя гев).  «ЛемОН», опрем цікавого выконаня коверів, захопит нас своіма власныма композициями. Окладинка плятні то композиция сніжынок, зложеных з ляльок-мотанок, припоминаючых членів ґрупы.

Попередні два альбомы ансамблю  «ЛемОН» – плятиновы, з номінациями до музычных нагоді Фридерикы – были з великом прихыльністю приняты в такой цілым музычным середовиску. Надієме ся, же так буде і тым разом. Більше інфромаций з істориі ґрупы чытайте за тым мотузком.  Заохочаме слухати!

Долов теледиск промуючий новий альбом.