Успеньскій одпуст в Чырчу

В найблизжий вікенд, 23-24 серпня в Чырчу, буде проходил одпуст з нагоды праздника Успіня Пресвятой Богородиці. То єден з успеньскых одпустів грекокатолицкой Пряшівской Архієпархіі.

Праздник зачне ся в суботу процесийом з села на Марияньску Гору, де, по посвячыню воды, буде служена Вечырня і св. Літургія. За дальшым пляном – смотрте на афіш.

Чырч, то русиньске село – славне поломницкє місце, в якым, подля записів в парафіяльній кроніці, двом дівчатам объявил ся старец, котрий вштурил в землю палицю. З того місця выплынула вода, яка мала оздоровляючу силу. Пак, старец наказал поставити при джерелі каплицю.

Дівчата оповіли селянам, што ся стало на горі, але люде ім не повірили. По тым, на село пришла катастрофа – великы выливы і аж товды люде рішыли збудувати на тым місци каплицю Успіня Пресвятой Богородиці.

(на фот. Ансамбль Чырчанка з Чырча, за:www.obeccirca.sk)