Свято Лосяньскых Мазярів

Музей Дворы Карвациянів і Ґладышів в Ґорлицях одділ Мазярска Загорода в Лоси і Ґмінний Осередок Культуры в Ропі, просят на Свято Лосяньскых Мазярів, якє буде проходило 24. серпня од 12.00 год. в Мазярскій Загороді в Лоси.

Не заведе ся нихто, хто буде ждал мазярскых атракций – буде конкурс на гонорового мазяра, буде конкурс одмірюваня і важыня коломази, буде проєкция фільму Ой поіхал мазяр в світ, презентация Ропа даром натуры, выпаляня дегтю і, вкінци, лотерия на переізды мазярскым возом.
Любителів інчого рода артистичных вражынь орґанізаторы запрашают на концерт ансамблю Терочка і дві выставы Лося інспірацийом для малярів і В річниці уродин лемківскым поетам. Окрем того, буде мож самому дашто выробити з дерева, лозины, бібулок, ниток, квітя…

Дрібниці чытайте на залученым афішы.