Штефан Ладижіньскый нагородженый владыком Йоаном

В днях од 6-го до 8-го новембра 2015 р. в ґрекокатолицькім Катедралнім соборі св. Йоана Крестителя у Пряшові одбуде ся уж 24-ый річник Фестівалу духовного співу візантійского обряду під покровительством владыкы Йоана (Бабяка), пряшівского архієпіскопа і метрополіты.

Орґанізаторы тогорічного фестівалу – Ґрекокатолицьке архієпіскопство і Здружіня Сакралны співы Выходу, отворять фестівал у пятніцю 6-го новембра о 16.30 архієрейсков святов літурґійов, на котрій будуть співати пряшівскы хоры. Головный фестіваловый концерт зачне в суботу 7-го новембра о 14-ій годині, на котрім выступлять многы ґрекокатолицькы хоры з Братіславы, Кошыць, Пряшова, Требішова, і Вранова над Топльов.

Тогорічный концерт фестівалу буде вынятковый тым, же на ним буде юбілантови Штефанови Ладижіньскому передана Ціна блаженого Павла Петра Ґойдіча, што є найвысше оцініня пряшівского архієпіскопа. Штефан Ладижіньскый, родак з русиньского села Матисова, жыє в Братіславі, а того року – 7-го марца, ославив свій жывотный юбілей, 90 років. Глубокы сліды актівной роботы в културі остали по Ш. Ладьжіньскім в колектіві ПУНА (ПУЛС) і в Русиньскій оброді, на челі котрой стояв зачатком років 2000. Свій плодный жывот присвятив културі, головно музиці і співу. Ціну до Пряшова приде у суботу перевзяти дівка Штефана Ладижіньского – Катарина Паштекова.

Штефан Ладижіньскый гуслі штудовав на музичній школі в Баньскій Быстріці в роках 1933 – 1938. Пізніше быв членом школьского орхестра на Руській ґімназії у Пряшові, де штудовав, в році 1943 ся став діріґентом співацького кружка на ІІ. Штатній ґімназії в Братіславі. Од того часу ся Ш. Ладижіньскый став частьов орхестралного жывота на цілу свою професіоналну карьєру, ці то уж як діріґент, або умелецькый ведучій, ці шефдраматурґ (быв ведучім ПУНА у Пряшові і многых далшых умелецькых ансамлів ці колектівів у Празі і Братіславі, основатель, формователь і першый директор братіславского штудіа „С“ (пізніше штудіо „Л+С“), засновав дітьскый колектів Русовскы внучата…). Штефан Ладижіньскый быв актівным і в русинькім возроднім русі. Його актівіты заміряны на Русинів запрезентовав і публікаційов русиньскых народных співанок під назвов Русиньскы перлы двома голосами. Выдав і многы збірникы про церьковны хоры.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА