Фотореляция з панихіды над гробом о. Димитрия Хыляка. Дуже знимок!

2015 рік, а тым більше місяц жолтен/октобер, то час, в котрым споминаме особу великого лемківского патріоты і священника – о. Димитрия Хыляка і 60. річницю його смерти та 150. народин.

З той же причыны, православны Русины з чужыны (західні землі Польщы), зорґанізували выізд на Украіну, до Золочева, де находит ся могыла того великого чловека. Подія проходила в днях 19.-21. жолтня/октобра т.р. Была то ВЕЛИКА ПОДІЯ – на міру історычной в нашым народі, зато, же нихто з бывшых парафіян о. Димитрия Хыляка (часы глубокого комунізму), не міг быти на його похороні, а тым більше до недавна не было знане місце спочынку того великого Лемка.

Центральны празднуваня одбыли ся в віторок (20.10), т.є докладні в 60. річницю смерти о. Хыляка. Што правда, з датом смерти і народжыня остатнього ізбяньского пароха были деякы неточности, але родина о. Димитрия Хыляка потвердила ону дату 20. жолтня/октобра 1955 р. Більше про проведены справы і особу Міністра Внутрішніх Справ Руской Народной Республикы Лемків – чытайте за тым мотузком.

Ден зачал ся стрічом з внучком о. Димитрия Хыляка – п. Лідийом Шебуньчак, котра розповіла про жытя свого діда. Реляция п. Лідиі єст цінна і автентычна о тілько, же коли вмер священник Хыляк, мала товды 17 років. Памятат діда за жытя як і споминала похорон, котрий прошол зо вшыткыма канонами православной церкви.

Пак ціла громада вырушыла на золочівскій цмонтір, жебы на могылі Лемка родом з Білцаревы, заспівати Вічну Памят. Тішыт факт, же окрем поломників з Польщы, на панихіду пришли і жытелі Золочева як і особы з Тернополя – родина єдных з участників екскурсиі. В самым Золочеві і поблизкых селах, до днес жыют Лемкы і іх потомны, котры были переселены на Совітску Украіну.

Неодолга на антені радия лем.фм будете мати змогу почути реляцию з панихіды, інтервю з парохом Ліґниці – о. Любомиром Воргачом, бесіду з о. Славомиром Сороканичом (настоятель Студзьонок) та з о. Михалом Ковальом, котрий походит з Золочева (днес служыт в вроцлавско-щеціньскій єпархіі). Завдякы ньому повелo ся найти могылу о. Хыляка. Почуєте тіж спомины внучкы про єй діда.

Долов заміщаме обшырну фотореляцию з той історычной подіі.