Про Волю Цеклиньску і про долі єй мешканців – проґрам «70 процент» – субота, 21.00 год.

Назвиско Цап не барз милозвучне, а нераз могло быти і причыном до высміваня. Дівкам все было легше: як ся оддавали, то брали назвиско мужа. Але парібкы ганьбили ся. Найбільше ― братя Штефан, Іван і Михал. Поіхали до Німец, де мож было ся вчыти на масаря і пекаря. Але якым авторитетом може быти, напримір, в Ґорлицях пекар з назвиском Цап? Выдумали змінити го на барз поважне ― Доньскій. Потім, коли будут брати участ в партизантскім руху, і до них долучыт ся брат Тимко, то і його запишут як Доньского.

О долях братів і сестер Цапів оповідают Мария і Анна, дівкы Тимка Цапа-Доньского. Знаменитий стрыко, Михал Доньскій, порадил і ім ― уж в Украіні ― так само змінити сой назвиско, гейбы для безпекы. Але дівкы ― уж Доньскы ― і так ся оддали, а Тимкова Марися по мужу ся пише Попівчак, а єй молодша сестра Анна ― Быченко.

Ци принесло ім нове назвиско щестя? Як уложыло ся жытя Цапів, Даниляків і інчых жытелів Волі Цеклиньской? О тым бесідуєме в днешнім проґрамі.

Премєровий одтинок проґраму «70 процент» в суботу о 21.00 год., повторіня в неділю о 3.00, 9.00 та 12.00 год. за лемківскым часом.