IX Стрічы Трьох Поколінь з лемківском культуром в Пшемкові!

В суботу, 7. листопада (новембра) т.р., Стоваришыня Лемків орґанізує в Пшемкові IX Стрічы Трьох Поколінь з лемківском культуром. Подія зачне ся од 16.00 год. в пшемківскым домі культруы.

Подія є направлена на вшыткы ґенерациі Русинів. Першу – тоту, котра іщы мала щестя народити ся на рідній Лемковині, другу – діти выганців, та третю – наймолодшу, т.є. внуків тых, котры днес передают своім потомным автентычний лемківскій язык, котрого днес, на жаль, чути уж штораз меньше.

Як і в попередніх роках, так і тым разом лемківска громада з Пшемкова, котра асоциює ся при тамтышнім Кружку Стоваришыня Лемків, зрыхтувала цікавий проґрам. Окрем ґаздів – Лемківского Ансамблю Пісні і Танця «Ластівочка», на пшемківскій сцені выступлят іщы «Троянда» і добрі знаны «Гудаци». Очывидно, не вільно нам забыти про наймолодшых – будуче нашого народу, т.є ансамблик «Ластівчата». До Лемків в гости завитат тіж Ансамбль Пісні і Танця «Кемблово».

Мило нам поінформувати, же радийо лем.фм єст медияльным патроном ІX Стріч Трьох Поколінь, што значыти може лем єдно – будме гын і напевно принесеме Вам, окрем радийовых реляций, вельо прекрасных знимок. Уж днес думаме над тым, жебы принести Вам 7. листопада з Пшемкова – прямий пренос, жебы тоты, што не зможут прити, чули нажыво цілу подію на антені нашого радия.