70 років по нашому

В 2015 році, Заслужений Академічний Закарпатскій Народний Хор святкує 70. річницю од свого основаня. Од самого початку мал в своім репертуарі русиньскы пісні, співанкы, танці і фольклористычны представліня, цілы сцены – образы з традицийныма русиньскыма обрядами, як “Баль в старым селі”, “Винобраня” і “Кычерка”. Інспірацийом цілой творчости хору, оркєстры і балетовой ґрупы єст фольклор Підкарпатской Руси. За період свойой діяльности, ансамбль выпустил вельо награнь на платнях, котры зрідка, за комуністычных часів, доходили і до Польщы, до розсіяных світом Лемків. Потішали они выгнаных люди, котры слухали “закарпатських” співанок і зачудуваны нараз здогадували ся што они по нашому.

В серци Ужгорода, в областній фільгармоніі, єст місце проб ансамблю, котрий творят солісты, хор, выборна оркєстра народных інструментів і балет. Там же, 18. жолтня  (октобра) т.р., о 17.00 год. (за украіньскым часом) одбуде ся торжественний концерт в 70. річницю основаня Заслуженого Академічного Закарпатского Народного Хору.

Концерт будут вести – артистычна кєрівничка ансамблю, заслужена працівничка культуры Украіны  – Наталія Петій-Потапчук, Наталія Делеган та знаний слухачам радия ЛЕМ.фм поета і співак – Василь Матола. Як написали орґанізаторы, в проґрамі вызвучат товры з “золотого” фонду, як тіж новы композициі і проєкты.

Радийо ЛЕМ.фм достало запрошыня на тото концерт, за котре щыро дякуєме.