«Червена Ружа» – фестіваль русиньской культуры в Мукачеві

Уж заран, 10. жолтня (октобра), в Мукачеві на Підкарпатскій Руси (днес Украіна) одбуде ся Фестіваль Русиньской Культуры «Червена Ружа». То циклічна подія, котра проходит в мукачівскым Закарпатскым Областным Театрі Драмы і Комедиі, орґанізувана Народном Радом Русинів Закарпатя, котру веде Євген Жупан – єй предсідатель.

На Фестівали Русиньской Культуры «Червена Ружа» выступуют артисты з цілой Підкарпатской Руси, представляючы ріжнорідны музычны жанры, од традицийных фольклорных вокально-танцувальных ансамблів, через професийональны хоры, до сучасных солістів, обнимаючых модерны виды русиньской авторской творчости.

Радийо лем.фм мало нагоду быти на влонишнім фестівали, котрий проходил 22. жолтня (октобра) 2014 р. Товды же, окрем сценічных выступів, была вручана премія Александра Павловича, котру отримал Йосиф Лемко.

Минулого рока, коли были сме на «Червеній Ружы», Закарпатскій Областний Театр Драмы і Комедиі звал ся іщы Закарпатскым Державным Росийскым Драматычным Театром, котрого традиция навязує до театру основаного в Аккермані над Дністром (1902 р.), але, як чытаме за інтернетовыма джерелами, кінцьом 2014 його дирекция рішыла змінити назву. Причыном ґу тому мала быти ситуация повязана з «войсковыма подіями на сході Украіны» та вельоетнічным профільом театру, не ограниченым лем росийскыма подіями.

В імени орґанізаторів – середчні просиме на тогорічний Фестіваль Русиньской Культуры «Червена Ружа», котрий зачне ся од 13.00 год. (за кыівскым часом) в Мукачеві, а пониже – кавальчык  єдного з минулых фестівалів.

фото горі: Фестіваль Русиньской Культуры «Червена Ружа» в 2014 р.