Русиньска гулянка на Коссак

В суботу, 17. жолтня т.р., Кружок Стоваришыня Лемків в Ліґници орґанізує чергову лемківску забаву в своіх порогах. Мож речы, же то уж традиция. Молоды Русины з чужыны зас стрітят ся при ул. Зофіі Коссак 6 в Ліґници, де будут мати змогу поспівати, погуляти та запознати ся медже собом.

Орґанізаторы заявляют, же тым разом буде дашто нове. Отже, передвиджено стояче парты (standing party). Не бійте ся, буде де сісти, кєд Вам ногы од гуляня одмовлят послугы. Буде тіж буде шведско-русиньскій стіл, з веце і меньше традицийныма стравами. Вступне лем 10 зл.

Як все, музыка з компутера. Місцевы гудакы уж знают, што мают принести.

Буде гын і радийо лем.фм, котре принесе Вам дакус знимок з той подіі.

Не дайте ся просити! Заохочаме!

За тым мотузком можете пізрити на фотореляцию з єдной з забав в Кружку СЛ в Ліґници.