В Пряшові зачав языковый конґрес. Передали ся премії за розвиток русиньского языка

Днесь в Пряшові зачав 4-тый Міджінародный конґрес русиньского языка, котрого оранізатором є Інштітут русиньского языка і културы Пряшівской універзіты в Пряшові.

Конґрес святочно одкрыв ся за співу русиньской гімны „Я Русин был…“, котру заспівав хор коло Православного катедралного собору св. Александра Нєвского у Пряшові. Потім вступным словом привитала участных Анна Плішкова, директорка спомянутого інштітуту, Мілан Портік – проректор Пряшівской універзіты, Павел Роберт Маґочій і Владимір Противняк, котрый участных поздравив в мені Русиньской оброды на Словеньску, значіть орґанізації, котра была основнов в процесі кодіфікації русиньского языка на Словакії.

На пропозіцію Научной рады 4-го Міджінародного конґресу русиньского языка, котра є в складі Василь Ябур, Павел Роберт Маґочій, Юліа Дудашова, Генрік Фантаньскі і Анна Плішкова, были днесь переданы Премії ім. Кіріла і Мефтодія за розвиток русинького языка. Премії здобыло 15 людей.

Премії собі днесь в Пряшові могли святочно перевзяти: Павел Роберт Маґочій, Рене Матловіч – бывшый ректор Пряшівской універзіты, за котрого выникнув Інштітут русиньского языка і културы Пряшівской універзіты, Генрік Фонтаньскі, Юрій Панько, Кветослава Копорова, отець Франтішек Крайняк, Александер Зозуляк, Анна Кузмякова, Іґор Керча, Валерій Падяк, Гелена Медєшійова, Іріна Папуґова, Наталія Гнатко, Івета Мелничакова, Анна Плішкова.

Вшыткым оціненым сердечно ґратулуєме і дякуєме їм за їх роботу, котра была на хосен нашого языка. На многая і благая літа!

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА