Русины з ЗША зберают в Польщы материялы на документальний фільм про Акцию «Вісла»

Через три дни двоє документалистів зо Зъєднаных Штатів Америкы – Мария Сільвестрі та Джон Ріґетті, рішыли затримати ся в Ліґници, жебы зачати знимкы до фільму про траґічну Акцию «Вісла». З єдным з редакторів радия лем.фм і чловеком доброй волі, котрий возил іх по ріжных місцевостях, іздили они од хыжы до хыжы, одвиджяючы найстаршых Русинів, котры были в 1947 році выгнаны з рідной Лемковины. Ідея, яка присвячує продуцентам, то награня як найбільшой кількости выгнанців, котры оповідают про тоты ганебны подіі.

В звязку з тым, же замірений фільм про Акцию «Вісла» буде документальным фільмом, продуценты своім респондентам старали ся давати подібны звіданя, жебы дознати ся, што поєдны особы думают на дану тему. Окрем самых выповіди, звіданя вказуют на вельо социйолоґічных аспектів, котры підкрисляют днес стан лемківской сосплільности на чужыні. Особы, котры давали інтервю, мали 77-93 років. Але Мария Сільвестрі і Джон Ріґетті провели тіж бесіды з представниками першого і другого поколіня осіб, народженых уж на землях выгнаня, звідуючы іх м. ін. про достоменніст.

З чужыны, продуценты рушыли на Лемковину, жебы гын провести подібны інтервю, котры схоснуют в фільмі. По дорозі мают пристанути в Кракові, жебы побесідувати з науковцями, істориками на тему выгнаня в 1947 році.

Продукция є спонсорувана Фундацийом Джона і Олены Тімо (John and Helen Timo Foundation), діючом в Пітсбурґу, котра занимат ся промоцийом карпаторусиньской культуры і пошыряньом знань на тоту тему.

Припоминаме, же стараньом тых двох осіб, влони вказал ся документальний фільм Changed by Thalerhof/ Перемінены през Талергоф про перший в Европі концентрацийний лаґєр в Талергофі. Премеєра одбыла ся о тым самым часі в Зъєднаных Штатах Америкы і в Рускій Бурсі в Ґорлицях. За тым мотузком найдете єдну з рецензий фільму. Фільм є доступний в каналі YouTube.

Долов коротка фотореляция з проведеных награнь.