Злочын на Новосільскым

Юрій Новосільскій (1923-2011) то єден з найважнійшых малярів в Польщы другой половины ХХ столітя, Лемко з походжыня. Уважаний за єдного з найвыдатнійшых сучасных іконописців.

Творчіст Ю. Новосільского вказувана была на вельох індивідуальных та колектывных выставах в Польщы і во світі, а сам артиста был вельократні нагороджаний найважнійшыма одзначынями з обшыри культуры і штукы, был тіж одзначений ордером св. Мариі Магдалины – найвисшым одзначыньом Православной Церкви в Польщы. В Президентскым Палаци в Варшаві в 2012 році отворено специяльні йому дедукувану салю, де презентуваных єст 10 його творів.

І хоц Ю. Новосільскій ціненй єст в світі як артиста найвысшой клясы, вказує ся, же сут місця, де до його творчости підходит ся легковажно і без найменьшого професийоналізму – в Ольшынах під Войнічом в Малопольщы іщы донедавна находила ся поліхромія авторвства Новосільского. Находила, а не находит ся уж зато, же не будучы вписаном в державний реґістер забытків і не будучы хороненом консерваторском опіком, перед парома тыжнями остала перемалювана руками маляря-аматора, жебы одсвіжыти розпис перед приближаючым ся кєрмешом. Доцяп остала змінена кольористыка, характеристычна міцна крискы змінена остала пастелями, додано золочыня, а тварі перемалювано, надаючы ім ярмарчний вид. O справі як перша заалярмувала на своім фб-овым профіли Кристина Черні – критик і історик штукы, знавчыня жытя і творчости Ю. Новосільского, авторка вельох книжок посвяченых його особі і творчости. Неодолга вкаже ся наступне выдавництво авторства К. Черні про творчіст Новосільского, яка находит, а в тым примірі можеме написати, же находила ся – в Малопольщы. Інчым приміром творчости Новосільского той части Польщы, котра, правда, не остала перемалювана, а замалювана, єст фіґуральна поліхромія проєкту Новосільского, яка находит ся в ґорлицкій катедральній церкви св. Тройці під варствром нoвшого розпису з 90. років, авторства Владиміра Гетьманчука з Украіны.

Розпис в Ольшынах то не єдине діло Ю. Новосільского, якє в остатнім часі было спрофануване. В Кракові при ул. Канонічій 15 зліквідувано каплицю, яку сам запроєктувал і прикрасил іконами, малюваныма од 50. до 90. років ХХ ст., Ю. Новосільскій. Вартат іщы додати, же в каплици тій находила ся євангелия, на котру присігал уряд Лемківской Республикы во Фльоринці в 1918 році. Каплицю зліквідувано, а іконы здемонтувано, зато же скінчыла ся умова арендуваня камениці, в котрій ся находила, а яку нанимала Фундация св. Владиміра. Властительом камениці єст Католицкій Костел, якій хоче в ній вмістити орґанізацийны бюра на приближаючы ся Світовы Дни Молодежы. Каплиця, подібні як речена поліхромія в Ольшынах, тіж не находила ся в державным реґістрі забытків, о што не задбали ани шеф фуднациі В. Мокрий, ани воєвідскій консерватор забытків. Вписаня каплиці в реґістер не дозволило бы на тото, што стло ся в остатніх днях серпня.

фот. архів радия ЛЕМ.фм