Снина привитать 30 умелців із 20-ох держав

Од 6-го септембра до 18-го септембра 2015 р. буде проходити вже 22-гый річник Міджінародного малярьского фестівалу в Снині.

Фестівал од 1994 р. орґанізовала напаред ґалерія Miro і пізніше Andrej Smolak Gallery. Цілый час ся о фестівал у Снині старать як раз Андрій Смоляк, академічный малярь русиньского походжіня, котрый окрім іншого має в місті Снина і пріватну основну умелецьку школу.

Того року на фестівалі буде брати участь 30 умелців із 20-ох держав світа. Мож спомянути од нам близкых держав як Польша, Білоросія, Росія ці Сербія, аж по такы екзотічны державы як Татарстан, Кірґізія, Ірак або Баграйн. Почас цілого пленеру можуть люди ходити і смотрити, як каждый день під руками малярів выникають новы умелецькы творы іншпірованы місцьом, простором, часом, котрый будуть умелці в Снині пережывати.

15-го септембра буде проходити выставка образів під голым небом. На Сниньскый камінь малярі вынесуть свої образы, котры там будуть выставлены од 11.00 год. до 13.00 год. До вынесіня образів ся можуть залучіти і люди. Каждый, хто вынесе єден образ на Сниньскый камінь, дістане купон, за котрый в ґалерії Андрія Смоляка потім дістане репродукцію єдного із образів. На подію сердечно запрошаме.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА