В суботу, 29. серпня т.р., лемківска ґрупа Надія завитат до села Радваниці на чужыні, де даст свій концерт як звізда вечера на ґмінных дожынках. Концерт зачне ся од 19.45 год.
О подіі заявляме, понеже в околицях Радваниц до днес жыє вельо Русинів, котры были выгнаны з рідных сел на Лемковині в 1947 році на західні землі Польщы. Лемківскы жытелі Радваниц то головні выселенці з села Білична (к. Ізб), котрого днес уж неє. Заховала ся лем стара грекокатолицка церков св. Михала, котра, щестливо, не остала розшабрувана і знищена як поінчы церкви на Лемковині.
Од 1947 р. в сусіднім селі Бучына істнує православна парафія св. Димитрия Солуньского, котра од 1948 р. занимат поевангелицку святыню, котру вірны пристосували до потреб східньой церкви. Першым парохом был о. Димитрий Хыляк, котрый был м. ін. вязньом Талергофа та міністром внутрішніх справ Руской Народной Республикы Лемків. Парафія чыслит ок. 50 родин, котры жыют в сусідніх селах попри Бучыні. До церкви в Бучыні причыслены сут тіж два православны цмонтері, єден в спомянутій Бучыні, а другій в сусіднім Лаґошові Великым, на котрых спочывают Лемкы.
![11037185_880864665335201_8967236521168080627_n](https://www.lem.fm/wp-content/uploads/2015/08/11037185_880864665335201_8967236521168080627_n-300x212.jpg)
![800px-Buczyna_cerkiew](https://www.lem.fm/wp-content/uploads/2015/08/800px-Buczyna_cerkiew-300x200.jpg)
![399px-2012-04_Buczyna_24](https://www.lem.fm/wp-content/uploads/2015/08/399px-2012-04_Buczyna_24-200x300.jpg)