IV Карпатскій Фільмовий Фестіваль в Тисній

В днях 4.-6. вересня (септембра) 2015 р. в Тисній одбуде ся IV Карпатскій Фільмовий Фестіваль, в рамках котрого пройде вельо артистычных і науковых акций. Каждий з трьох днів фестівалю мат свій профіль і означений єст як: пятниця – науковий ден, субота – фільмовий, а неділя – літерацкій.

Фестіваль зачне ся одкрытьом выставы фотоґрафій Петра Дурака і выставы рысунку Кжыштофа Сушка, а дальше одбуде ся наукова конференция пн. «Карпатскє культурово-етнічне погранича вчера і днес», орґанізувана Полудньово-Східнім Науковым Інститутом. Перший ден скінчыт ся показом сляйдів і спільном стрічом при ватрі. Субота, означена як фільмова, принесе присутным показ документальных фільмів і стрічу з русиньскым літератом Марошом Кряйняком, автором названых в Польщы лемківском трилоґійом книжок «Карпатія», «Ентропія» і «Інформация».

Остатній ден IV Карпатского Фільмового Фестівалю буде стрічом з авторами і творцями, в ріжний спосіб навязуючыма до Карпат. Єдным з них буде Валерий Падяк, автор і выдавця, выкладовця в Інституті Русиньского Языка і Культуры на Пряшівскым Університеті.

Фестіваль скінчыт ся музычным концертом ансамблю Лемко Блюґрас Банд, котрий в своій творчости часто сігат по лемківскы пісні, стилізуючы іх на американьскє кантри.

Більше інформаций найдете на сайті орґанізатора.