VII Фестіваль «Стріча Культур» в Щеціні

Заран, 20. серпня, на подворцях щеціньского Замку Поморскых Князів зачне ся VII Фестіваль «Стріча Культур». То циклічна, шторічна подія, орґанізувана локальныма властями враз з орґанізациями зосереджаючыма нацийональны і етнічны меншыны Щеціна – столиці західньопоморского воєвідства, де в рамках Акциі «Вісла» в 1947 р. выселены были і Лемкы.

Тогорічний фестіваль зачне ся концертом росийскых пісен і романсів (четвер, 20. серпня),  в пятницю, як товаришуча подія, одбуде ся Ден Ромской Культуры, а в дальшы дни на фестівальовій сцені являт ся ансамблі, котры презентуют культуры другых народів, жыючых в пілнічно-західній Польщы: Ромів,  Греків, Украінців, Жыдів, Лемків, але і ґрупы, інспіруючы ся музыком другых обшыри Славянщыны і навет Близкого і Далекого Сходу.

Лемківскій репертуар почуєме вчас концерту львівского фольково-кантри-батярского ансамблю Лемко Блюґрас Банд, котрий охочо сігат по русиньску народну музыку з Лемковины і інчых части Карпатской Руси.

Полний проґрам найдете за тым мотузком, а долов – можете послухати кавальчык творчости ансамблю Лемко Блюґрас Банд.