Стріча родаків із Блажова

1-го авґуста 2015 рока одбуде ся стріча родаків села Блажів і осад Блажовска Долина і Чертеж. В рамках проґраму буде о 10.00 год. одслужена і ґрекокатолицька Божественна літурґія парохом із Ґрекокатолицькой парафії в Жаковцях вєдно з далшыма духонвныма навколишніх парафій. Стріча буде на теріторії бывшого села.

Село Блажів было русиньске село на Словакії, о котрім выселіню вырішыла комуністічна влада у 1952 році про потребы вытворіня воєньского выцвікового простору Яворина подля закона ч. 169 із 1949 р. В Блажові дотуляло ся то 212-ох родин.

Хоць векшына жытелів села з выселіньом і условіями выселіня не была согласна, 30-го мая 1952 року было зачато з вселіньом осады Чертеж, за асістенції поліції, і поступно была выселена і осада Блажовска Долина і ціле село Блажів. Жытелі были выселены головно до сел і міст як Шарішскы Михаляны, Жаковці, Сабінів, Гунцовці, Собранці, Снина, Спішске Подградя.

Выселены жытелі не были спокійны з вышков компензацій за свій маєток, ани з условіями, до котрых были выселены. Зато вже у 1953 році 127 родин вернуло ся до Блажова. Владі потім тырвало далшы два рокы, покля повело ся Блажів цалком выселити. Остатній жытель село дефінітівно опустив 26-го мая 1955 р. За протесты проти выселіню было докінця одсудженых пять жытелів, котры дістали кары од єдного місяця до єдного рока. По 1955 році зістала у Блажові стояти лем церьков, котра была таксамо пізніше збуряна, чім влада хотіла забранити, жебы ся стала путницькым центром бывшых жытелів.

1-го децембра 2010 року Влада Словацькой републікы своїм наряджіньом ч. 455/2010 дефінітівно вырішыла о зрушіню Воєньского обводу Яворина і о тім, же катастрална теріторія вывшого села Блажів є теперь приєднана до катастралной теріторії села Тихый Потік (колись Штельбах). У 2011 році было засноване Лісне і польногосподарьске дружство Блажів. Бывшы маїтелі і їх потомкове, котрым были вернуты маєткы в рештітуції, намагають ся знова ґаздовати і піднимати дідовизну своїх предків.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА