По вернісажу выставы «Кольорова Церков» в Бортным

Як ся вказує, бортняньска церков могла чыслити не лем тых 9, але аж 17 кольорів. Част той кольоровой істориі церкви схотіло ся в минулу неділю ожывити. Отже, того дня, 26. липця в церкви свв. Космы і Даміана в Бортным на Лемковині, проходил вернісаж выставы під назвом «Кольорова Церков». То дост особлива выстава, бо бесідує не о тым што єст, а о тым, чого неє…

Бесідувала Клавдия Збєґєнь, кєрівник одділу Мазярской Загороды в Лоси з Церквом в Бортным Музею Дворы Карвациянів і Ґладышів.

Выстава складат ся з трьох части. Перша, поміщена в притворі, одповідат зовнішньому выглядови церкви і оповідат головні о кольорах. В 60. роках, вчас ремонтуваня храму, одкрыто на церкви аж 17 ріжных барв. Одтворено лем пару, найчастійше выступуючых на Лемковині, бо треба додати, же більшіст церкви на Лемковині была ззовни вельофаребні помалювана. Окрем того, в першій части выставы мож почытати про ціле прицерковне забудуваня. В храмі вірных запрезентувано велику част ікон, яка находила ся колиси в церкви. За справом выставы нашла ся зас – хоц не як фактычны іконы, на разі лем як макєты. Іконы остали докладні пояснены, з натиском на символіку кольорів в іконі. Остатня част выставы находит ся в олтари, за іконостасом, в місци священників, зато тіж там найдеме таблиці з історийом бортняньскых єгомостів. Професийніст выставы осягнено завдякы заанґажуваню вельох специялістів:

За артистычну страну выставы одповідала Жанна Орхель, яка походит з Білоруси, а од 5 років мешкат в Польщы і єст працівником Музею Дворы Карвациянів і Ґладышів.

Іконы, якых тепер в храмі неє, находят ся головні в колекциях музеів в Ланцуті і Саноку, а серед них єст правдива перлина – ікона Деесіс о долгости праві 7 метрів:

Днес тота церков єст уж лем музейным объєктом, але єй ориґінальна функция єст не дооцініня:

Выстава єст частю більшого проєкту, в рамках котрого має быти проведена документация і кверенда цілости артистычных, забытковых та історычных прикмет церкви. А на фінісажы выставы (якій буде проходил 3. жолтня т.р.) запрезентувана остане мультімедияльна аплікация, даюча змогу віртуальні звиджіти і обізеріти церков так, як выглядала она в ориґіналі, а то за справом специяльного дотыкового панелю, якій остане замонтуваний в притворі церкви.

Орґанізатором выставы єст Музей Дворы Карвациянів і Ґладышів в Ґорлицях одділ Мазарска агорода в Лоси з церквом в Бортным. Спілорґанізаторами: Православна Парафія в Бортным, Стоваришыня Розвитку Села Бортне і Бодакы, а партнером проєкту – Одділ Церковной Штукы Музею-Замку в Ланцуті. Проєкт єст реалізуваний завдякы дотациі Міністра Культуры і Народового Дідицтва.