Памятник переселеным в Сокільниках

В Сокільниках, в неділю 28. червця т.р. о 12.30 год., буде торжествнно одкрытий памятний, знак депортуваным 70 років тому з Польщы. Він зове ся «Без вины покараны…», а його автором єст Микола Гурмак.

Сокільникы ― великє село (передмістя Львова), котре належыт до Пустомытівского району. До ІІ Світовой Войны было польскым селом, а по выселіню польскых родин, заселене переселенцями з Польщы, в тым і Лемками, якых в Сокільниках замешкало барз дуже.

Сокільникы были не лем місцьом прожываня переселеныма Лемками, але і єдным з лемківскых осередків. Власні в Сокільниках для «70%» было награне інтервю зо знаным різбярьом Мироном Амбіцкым (братя Мирон і Юрий Амбіцкы, котры вродили ся в селі Прусік коло Санока то авторы чысленных памятників, барельєфів во Львові і в Украіні.)

В 2000 році в селі поставили нову церков Успіня Пресвятой Богородиці (парафія Украіньской Православной Церкви Кыівского Патріархату) і власні коло ней стане новий монумент. В тій подіі, з нагоды посвячыня памятника до Сокільник, возмут участ владыкы, священикы (православны і греко-католикы, бо в селі єст і греко-католицка парафія), представникы влады, представникы соспільно-культурных товариств, будут гості зо Львова, дуже Лемків і жытелі Сокільник, вывезены з рідной землі в 1944-1946 роках та іх діти і внукы.