Лемківска Едукацийна Загорода 2015 – дармовий табір для діти і молодежы
Великыма кроками приближают ся літні вакациі. По успішным піонєрскым, влонишнім таборі і того рока Стоваришыня Руска Бурса мат для вас таку оферту – дармовий табір для діти і молодежы Лемківска Едукацийна Загорода – Як жыли нашы предкы?
Табір буде проходил в днях 10.-16. липця 2015 р. в Лемківскій Едукацийній Загороді в Ґладышові під оком кваліфікуваных інструкторів – Дануты і Ваня Дзюбинів.
Вчас табору ведены будут варштаты традицийного ремесла і лемківскых звыків. В проґрамі варштатів найдут ся:
- ґаздівскы роботы: кошыня, молочыня, молотя зерна,
- традицийне ремесло: робліня ґонтів, кычок, лыжок,
- обрабляня лену, волны, пряджыня, тканя полотна,
- робліня мотузів,
- лемківскє ідло: печыня хліба, вырабляня масла, огріваня сыра, варіня страв.
Додатково, буде наука лемківской бесіды, істориі, звыків, співу. Буде тіж змога походити по околици, звидіти церкви, посідити і поспівати при ватрі.
В таборі можут взяти участ діти в віку 12-17 років. Занятя ведены будут по лемківскы.
Табір єст цілком дармовий. Орґанізаторы забезпечают спаня, выжывліня, опіку та вшыткы варштаты. Участникы прошены сут о доіханя на свій кошт.
Знимкы з І табора мож обізрити на нашым сайті за тым мотузком.
Для заінересуваных табором подаєме контактовы номеры телефонів: 513 011 863, 18 351 00 50 – Данута і Ваньо Дзюбина. Зголошыня просиме давати до 15. червця на дакотрий з телефонів.
Повязаны дописы
Ґорлиці 106,6 MHz
