Василь Мадзелян (1917-2005) – до даты народжыня

Днес, 22. червця т.р., минят 98. річниця народин Василя Мадзеляна. Пришол на світ в 1917 році  в ЗША, в Монсин (Пенсильванія), з той причыны, же його отец выеміґрувал з Лемковины перед І Світовом Войном. Але уж в 1920 році, родина Мадзелянів вернула до рідного села Білцаревы. Ту, його отец, тіж Василь поставил на ногы ґаздівку, стаючы ся передовым ґаздом в селі.

Пак, отец послал молодого Василя на школіня до Санча, де тот в 1937 році, здал матуральний іспыт. В 1938 році, коли за західьном польском границьом шаліла гітлерівска зараза, молодий Василь Мадзелян рішыл скорыстати зо свого америцкого громядянства і выіхал до краю народжыня. Гын, вступил до арміі і долго воювал о свободу. По ІІ Світовій Войні бил ся іщы в Кореі, а кєд настал спокій взял ся дале за науку. Скінчыл Мерилендскій Університет, а пак, коли вышол з войска, зас пішол на універистет, але на тот раз в каліфорнійскым Сакраменто. Закінчыл го дипльомом Мастер оф артс і через 15 років вчыл інчых малювати, рысувати і різбити. По переході в 1979 році на пенсию, посвячат ся своій жытьовій пасиі – малює, рысує, різбит.

Творчіст Василя Мадзеляна то в більшости творы, котры тыкают ся рідной Лемковины, єй природы, краєвиду, люди і тяжкой істориі. Артиста з поводжыньом занимат ся декорацийном кераміком, різбит в камени, бронзі, дереві, але найліпше бодай чує ся в ґрафіці. З той причыны, днес найбарже сут нам знаны його прекрасны ґрафікы, котры, як уж было спомнене горі, тыкают ся лемківского світа. Цикль 33 ґрафік назвал Лемківскым іконостасом. Был участником чысленных вернісажів і выстав, на котрых медже інчыма презентуваны были творы з повязаны з лемківском тематыком.

Вмер в 2005 році, на 88 році жытя, на чужій америцкій земли. Похований єст на цмонтері для заслуженых ветеранів америцкой арміі.

Василь Мадзелян был братом поеты і писменника- Семана Мадзеляна.

Долов презентуєме пару ґрафік з цуклю Лемківкій іконостас: