Ювілей Мирона Жыроша

Днес проходит річниця уродин Мирона Жыроша, родженого 1. червця 1936 рока в Рускым Керестурі – педаґоґа, юристы, журналісты, публицисты, писателя, автора вельох книжок про етноґрафію та культру Русинів, історика проукраіньской опциі.

Освіту здобыл М. Жырош найперше в Сомборі, пак в Новым Саді скінчыл Высшу Школу Шкільной Адміністрациі і правничий факультет на бельградскым університеті. Выкладал в парох русиньскых школах в Войводіні (Дюрдьові, Рускым Керестурі, Новым Саді), был юридычным консультантом та директором кооператывы Перший Май в Рускым Керестурі.

В роках 1966-1991 был журналістом русиньского проґраму радия Новий Сад, для якого написал 100 проґрамів посвяченых ріжным аспектам жытя Русинів, пак опубликуваных в збірнику Погляды до минулости. М. Жырош єст тіж автором парох сценариів до телевізийных проґрамів про сучасне жытя Русинів, напр. 225 років школы в Рускым Керестурі, Горниця і Русины, Русины і Шайкашкей. Публицистычны і науковы дописы друкувал в „Народным русиньскым календарі”, в часописі „Шветлосц”, „Нова думка”, „Думкы з Дунаю”, „Карпатскій Край”, „Рускє слово” і інчых. М. Жырош єст автором пару книжковых выдань: Спомины про минуле, Жыва Горниця (в двох томах), Надія над чуджым небом, Бачваньско-сримскы Русины дома і во світі (в двох томах).

По переході на емеритуру оселил ся на Мадярах в селі Мусцоны.