Премєра пєсы „Ковалі“ вже тоту пятніцю в ТАД

В пятніцю 22-го мая 2015 р. о 19.00 год. на Великый сцені єдиный на світі професіоналный русиньскый театер – Театер Александра Духновіча в Пряшові, буде мати остатню премєру в тій театралній сезоні. Премєру буде мати пєса під назвов „Ковалі“ од сербского автора Мілоша Ніколіча.

Пєса є абсурднов, місцями терьпков комедійов, котра вас заведе до ковальской ділні, десь в Німецьку. В ній ся десяткы років по войні стрічають трьоми ковалі, бывшы вояци, котры вдяка „службі отцюзнині“ проплели свої долі і свої роды. Каждый забеспечів свого потомка і наслідника свойой кузні. Но як раз тота реалность їх по роках дожене до безнадії і выжадать собі їх стрічу. Но кому властно іщі потрібны ковалі і їх кузні? Чекать на вас много запліток і розузлінь.

О своїм творі і собі хоче автор русиньскій публіці на Словакії повісти слідуюче:

О Русинах мам лем тото найліпше суджіня. Мам на то і причіну. Написав єм комедію „Светіслав і Мілена“, котра довго стырчала у шуфладках Сербского народного театру в Новім Саді аж довтогды, покля на функцію умелецького шефа не пришов Русин Дюра Папгаргай і дав єй до репертоара. Комедія в тім театрі удомашнила ся, 20 років не пішла зо сцены. Сербскый народный театер собі потім обїднав далшу комедію – Ковалів. Кібы не было єдного Русина – Дюры, были бы сьте вы і многы глядачі в Румунії, на Словакії, в Ґреції і Сербії збідніли о єдну добру комедію.

Найвекшый комплімент як писатель єм дістав почас вечері по премєрі в Корінті. Єден актор на мене довго смотрив і конечно повів: „І што ты властно хочеш?! Тадь ты такый самый як мы!“ Шумні то повів. Я точно такый як они, тоты Ґреци з Корінта, як хоцькотрый Румун, Словак, властно як вы.

Та єм му написав єдну комедію, тотых Ковалів, жебы єм звернув увагу Корінтянів, і Белеградчанів, Букурештянів і Атенчанів, і Вас і вшыткых коло нас і вас, же мы такы самы, і же не єствує жадна причіна доберати ся взаємно, жебы сьме ся о тім пересвідчіли.

Як ся вам комедія буде любити, хвальте акторів, режісера і мене. Як ся вам не буде любити, найвеце виноватым є Дюра.

Сердечно запрошаме уж тоту пятніцю о 19.00 год.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА