88. річниця уродин Василя Хомы

Днес, 18. мая, є 88. річниця уродин Василя Хомы – історикя літературы, професора, педаґоґа, дипльоматы, соспільного діяча, Русина з Пряшівской Руси.

Вродил ся Василь Хома 18. мая 1927 рока в Миковій.  Три рокы вчыл ся в ґімназиі  в Меджелабірцях, а 4. клясу в Пряшові, матуру здобыл в Гуменным. Вчыл ся там в роках 1945-1949. Пак студиювал росийскій язык і літературу, найперше на Братиславскым Університеті, а студиі закінчыл на Ленінградскым Університеті. Ступін доктора здобыл на Карльовым Університеті в Празі в 1965 році. Іщы в 50. роках зачал вчыти росийской літературы на Высшій Педаґоґічній Школі в Пряшові. В роках 1960-69, 1988-93 был выкладовцьом на Коменьскым Університеті в Братиславі. Коли не вчыл, занимал річны становиска в комуністычній Чехословациі – был інспектором в Міністерстві Шкільництва Словациі, віцеміністром культуры федерального ряду в Празі, робил тіж в Міністерстві Заграничных Справ. Был тіж номінуваний на віцеамбасадора Чехословациі в Бельґіі.

Василь Хома вельо публикувал про росийску літературу ХХ столітя, як тіж про поствоєнну украіньску літературу пряшівской обшыри. В половині 90. років зачал занимати ся і сперати русиньскій нацийональний рух. Од того часу опубликувал вельо робіт про украіньско- і русиньскоязычных писменників в Словациі, напр. Розвиток русиньской поезиі в Словациі од 20. до 90. років ХХ столітя.

В сумі В. Хома печатал більше як 300 робіт, 6 моноґрафій. Єст автором підручників русиньской літературы, зрыхтувал до печатаня 3 выданя Русиьнского Літературного Альманаха. Был орґанізатором Общества русиньскых писменників Словациі, а в 2005 році выдал моноґрафію Одроджыня Русинів.