Владимір Одрехівскій – „Скульптура”

15. мая тр. в Нацийональным Музею ім. А. Шептыцкого во Львові буде проходил вернісаж выставы Скульптура – різбяря лемківского походжыня Владиміра Одрехівского.

Владимір Одрехiвскій – професор Катедры Монументально-Декоратывной Різбы Лвівской Нацийональной Академіі Мистецтва, ведучий секциі різбы Львівской Областной Оґанізациі і выдатний артиста-різбяр родом з Вількы, джерельця лемківскых різбярів, де вродил ся його отец, очывидні, тіж різбяр – Василь Одрехівскій, мати Владиміра то выдатна співачка  – Мария Байко (єдна з сестер співачого ансамблю Тріо Сестер Байко), родом з Яблониці на Коросняньскій Руси.

Владимір Одрехівскій вродил ся 14. мая 1955 рока во Львові. В роках 1972-77 студиювал на выділі артистычной керамікы Лвівской Нацийональной Академіі Мистецтва, пак в 1983 році закінчыл аспірантуру в Санкт-Петерзбуржскій Державній Артистычно-Індустрияльній Академіі ім. А. Л. Штіґліца, а в 1985 р. оборонил там ступін доктора. Од 1992 рока был на артистычным стажу на Парижскій Академіі Штук.

Од 1975 рока зачал выставляти своі працы. Різбы Владиміра Одрехівского мож было видіти уж на більше як сто выставах во Франциі, Швайцариі, ЗША, Росиі і, очывидні, по цілій Украіні. Вельократно творчіст В. Одрехівского была выріжнаня і признавано єй медженародовы нагороды і преміі.

В доробку В. Одрехiвского находит ся перешло 200 статуй і 50 монументальных творів, якы находят ся головні в Украіні, але тіж поза єй границями. Найважнійшы з них то монументы Будителі (Стрый, Украіна 1995), Мария і Чеканя (Віллен сюр Сен, Франция 1999), памятникы Т. Шевченка в Севастополи (2003) і в Атенах (2010) та парковы композициі Родина (2007).

Выставу буде мож обзерати од 16. мая до 7. червця 2015 рока.