Матурітны екзамены в русиньскім музею в Пряшові

Дня 13-го мая 2015 р. ся в просторах Словацького народного музею – Музею русиньской културы в Пряшові одбуде практічна часть матурітных екзаменів цілой класы штудентів Середньой фаховой школы бізнісу в Пряшові, котры штудують маркетінґ турізму.

Практічну часть екзаменів там будуть мати штуденты, котры почас свого середньошкольского навчаня робили свою практіку як раз в русиньскім музею. Зато їх головнов матурітнов темов є „День в Словацькім народнім музею – Музею русиньской културы в Пряшові нетрадічно“. Підтемы суть: Маркетінґ в музейницьтві, Музей русиньской културы вчера і днесь, Історія і особности Русинів, Звыкы і традіції у Русинів, Традічны стравы, Традічны ремесла у Русинів, Сакралны артефакты і будовы, Православна церьков св. Александра Нєвского і Ґрекокатолицька церьков св. Йоана Крестителя, Деревяны храмы, Презентація познаваючого заязду – Деревяны церькви, Презентація анімачного проґраму в музею, Релакс про тіло і душу, Вытварне уменя русиньскых малярів і далшы.

Цільом матурантів є спрацованя даной проблематікы і звернутя увагы верейности на Музей русиньской културы. На практічній части матурітного екзмамену будуть окрім матурітной комісії брати участь і ґенералный директор Словацького народного музею, представителі Матиці словацькой з Мартіна, як і представителі обчаньскых здружінь Русинів на Словакії (писателі, умелці ітд.). Матурітный екзамен є одкрытый і про навщівників музею.

Практічна часть є повязана і зо смакованьом дакотрых русиньскых страв. Буде то нетрадічна стріча матурантів з дакотрыма особностями русиньской културы і позваныма гостями.

Петро Медвідь

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА