Володислав Грабан кінчыт днес 60 років

Днес, свою 60-тку празднує Володислав Грабан. Народил ся 15. мая 1955 рока в Костомлотах коло Вроцлавя, де остали выселены його родиче в 1947 році. Враз з родичами, повело ся му вернути на рідну Лемковину, де жыє до днес. По мамі родом з Чырной, а по няню – з Ґладышова.

По закінчыню основной школы выіхал на Шлеск, де кінчыл технікум і піднял роботу. По повороті з чужыны, оселят ся в Креници, де анґажує ся в культурну, громадску і реліґійну діяльніст. Остає орґанізатором першых по выгнаню лемківскых маланок в Креници. Был спілініциятором першых Лемківскых Ватр, котры орґанізувал головні з Маестром Ярославом і Петром Трохановскыма. Великій вклад внюс тіж в діяльніст Музею Лемківской Культуры в Зындрановій, анґажуючы ся в орґанізацию свят “Од Русаль до Яна”. Грабан, як поета, заініциювал першы Лемківскы Творчы Осени. Основал і вюл часопис зындранівского музею – “Загорода”.

Як творця, поета Володислав Грабан заістніл найперше в польскым літературным середовиску. Кінцьом 70. років ХХ столітя, зачал спілпрацу з украіньскым тыждеником Наше Слово, де публикувал своі вершы, але тіж фотоґрафіі і дописы. Выдал штырі авторскы збіркы поезий. Переводил на лемківскый язык творы інчых авторів, м.ін. з украіньского – вершы Антонича. За свою творчіст остал нагороджений нагородом Міністра Культуры і Штукы. Од 2000 р. єст членом Нацийональной Спілкы Писменників Украіны.

На Многы і Благы Літа!