О Талергофі в Лоси

Музей Дворы Карвациянів і Ґладышів, та Мазярска Загорода в Лоси просят на выставу “Талергоф 1914-1917”, котрой автором єст ґорлицкій Єпархіяльний Осередок Православной Культуры ЕЛПІС. Выстава, котра буде отворена 2. мая 2015 р. в Мазярскій Загороді в Лоси, навязує до початку ХХ столітя і ґеєнны Русинів, жыючых по пілнічній стороні Карпат.

Влони, в 100. річницю Талергофу, одбыло ся вельо выстав, науковых панелів, акций, котры припоминали світу о тій траґедиі русиньского Народу, коли то такой ціла товдышня лемківска еліта, інтеліґенция, священникы і соспільны лідеры были поневолены в першым в Европі концентрацийным лаґрі.

В 2014 р. такой вшыткы імпрезы, орґанізуваны лемківскыма орґанізациями Стоваришыньом Лемків і Стоваришыньом “Руска Бурса”, мали в проґрамі елементы, або навязували до траґічных подій з періоду І Світовой Войны: ХХХІV Лемківска Ватра на Чужыні б Михалові, VIII Медженародне Бієнале Лемківской/Русиньской Культуры в Креници, Лемківска Творча Осін в Тыличы/Ґорлицях. Вшыткы три подіі трансмітували сме нажыво в радию лем.фм.

Талергофского лаґру “не дочекал”, забитий австрийскым ротмістром 6. вересня 1914 р., о. Максим Сандович, канонізуваний Польском Автокефальном Православном Церквю в 1994 р. 2014 рік был 100. річницьом його мученичой смерти і 20. річницьом причысліня до лику святых.

З темом Талергофу звязаний єст фільм Перемінены през Талергоф (Changed by Talerhof), котрий вышол початком того рока. Його премєра одбыла ся в тым самым часі в ЗША і Рускій Бурсі в Ґорлицях – 7. марця 2015 р. Можете го обізрити долов (находит ся в сервісі YouTube).