Реставрация дзвінниці в Королику Волошскым

Як інформує порталь www.polakpotrafi.pl, выстартувал проєкт ратуваня – реставрациі церковной дзвінниці в Королику Волошскым. Ґрупа ініцияторів того проєкту замірює в будучности одремонтувати цілий сакральний комплекс т.є. окрем дзвіниці – тіж церков.

Єднак, вшытко вымагат одповідніх фінансовых середків. Кєд мате змогу і чуєте потребу спомочы тот проєкт, то орґанізаторы, окрем великой вдячности, мают для вас прекрасны дарункы (малы іконкы, нашыйны медалийоны і ін.).  На реалізацию реставрациі самой дзвіниці треба ок. 14 тис. зл. Заплянувано, же одкрытя одновленой дзвінниці буде мало місце 15. серня т.р, в 70. річницю траґічной депортациі бывшых жытелів Королика Волошского на совітску Украіну.

Стоваришыня Королик Волошскій, котре заініциювало акцию, остало покликане в 2009 році. Уж днес може ся оно похвалити хоц бы тым, же вдало ся його членам позыскати право власности до церковного комплексу та дорогу до церккви і цмонтеря. Окрем того, систематычні порядкуют терен окружаючий церков. Вдало ся тіж забезпечыти храм перед грабителями, монтуючы новы двері і затыкаючы вікна.

Мрийом Стоваришыня Королик Волошскій єст основаня в одреставрованым церковным комплексі музею сакральной штукы Лемковины. Місце тото мало бы стати ся символом незгоды на нищыня слідів минулого.

Не будме, предовшыктым мы – Лемкы, обонятны на такы ініциятывы.

Веце інформаций за тым мотузком.