Раз, два три – Осмеро

Осмеро

Осмеро ангелят з неба
рішыло быти актывом,
котрий рівно поділит
злато, миро, кадило.

Зобрали ся раз в Высовій
радити в велькым секреті,
архістратига выбрати
і поділити бізнесы.

Осмеро ангелят з неба
заяву пропонувало,
лем єден думал за долго,
семеро внет ся остало.

Семеро ангелят з неба
свій напрям консультувало,
лем єден задал звіданя,
будуче уж го не ждало.

Шестеро ангелят з неба
пісньом ся потішало,
лем єден співал фальшыві,
а ехо за ним звучало.

Пятьох ангелів з неба
было уж праві согласных,
лем єден вышол в потребі,
а двері ся за ним затрісли.

Четверо ангелят з неба
наново ся доєднало,
штырьох – то фурт за вельо,
трійця шыковне імено.

Троє ангелят з неба
рівняло своі крылята.
Єдно підскубли кусіся
і двох сой подає ручата.

Двох ангеликів з неба
по плечах ся поклепало
перший мал цызор схований
і гоп єдного не стало.

Єден ангелик з неба
тепер сам себе промує
і оголашат през радийо
што щыро сам ся любує.

Лем тепер гора сказала
“Чорну-с роботу одвалил,
більше не буде потребы,
дост єс сам себе прославил.”

Коли не было уж з кого
делеґациі выбрати.
І коли омерзло навет
на бій тот ся призерати

оголошено з амбоны
в згоді з паритетами,
чорт депутуваным
демократычні выбраний.

Адже, маючы ясніст,
котра іх цілям світила,
заєдно ангелам з неба
моральніст не пошкодила.

Богдан Ґамбаль
25.09.2013