Христосъ воскресъ!

Витаме Васъ дороги братья Лемки, въ радостнôмъ дни Воскресенія Христового. Витаме Васъ, въ томъ найвекшôмъ христіянскомъ святѣ. Витаме въ томъ святѣ христіянской любови и жичиме той любови дорогой нашой родинѣ, нашой Лемковщинѣ — жичиме еи братьямъ: Лемкамъ и сестрицямъ – Лемкииямъ, такъ тутъ въ нашомъ краю, якъ и остаючимъ далеко отъ насъ въ заморскихъ краяхъ, въ Америцѣ. — Жичиме той любови и цѣлой нашой Руси, вшиткому рускому народу. Жичиме любови нашой Руси, бо она якъ разъ теперь найвеце еи потребує, бо незгода, бо сварня, що разъ веце и веце вкоренятся въ рускій народъ, и розрыватъ и дробитъ eгo на части, на партіи, — а тоты партіи, съ што разъ то векшою враждою выступаютъ противъ себе. Враги Руси тѣшатся, радуются, што посѣяли незгоду, што посѣяли сварню межи рускимъ народомъ; радуются, тѣшатся, што Русь подѣлили, подробили. Враги тѣшатся, бо видятъ што осягнули свою цѣль — бо рускій народъ, ужъ самъ теперь, и безъ нихъ, нищится, самъ себе доѣдатъ, убиватъ.

Для того мы и жичиме въ днесьное свято христіянской любови, жичиме той любови, дорогой намъ Лемковщинѣ и цѣлой Руси нашой. Нехай на вшиткой Руси якъ она велика, далека и широка, — нехай въ цѣломъ стомиліоновомъ рускомъ народѣ засѣяе съ гнеснѣмъ святомъ згода, единеніе, любовь – Нехай съ тымъ святомъ начне ся любовью обновленная жизнь для вшиткой стомиліононовой руской родины.

Христосъ воскресе!