XV Світовы Дни Поезиі в Варшаві з Петром Мурянком

Днес зачынают ся XV Світовы Дни Поезиі, котры проходят в ріжных містах мазовєцкого воєвідства. В богатым проґрамі находят ся стрічы з поетами, прелекциі для молодежы, музычно-поетыцкы вечеры і концерты. Більше інформаций найдете на заміщеным ниже проґрамі.

Посеред запрошеных гости находит ся Петро Мурянка, котрий запрезентує своі вершы і співанкы не лем на поетыцкых вечерах і концертах, але тіж стрітит ся молодежом Загальноосвітного Ліцею ім. Ю. Словацкого в Варшаві. Як дознали сме ся од орґанізаторів XV Світовых Днів Поезиі, 16. квітня, на торжественній Поетыцкій Ґали в Музею Літературы ім. А. Міцкєвича на варшавскым Старым Місті, Петро Мурянка, як почестний гіст стрічы, засяде в фотели Юлияна Тувіма.

З нагоды XV Світовых Днів Поезиі буде выданий специяльний номер часопису Поезия днес (Poezja dzisiaj), в котрым найде ся обшырний материял о Лемковині і самым Петрі Мурянці.