Одднесь русиньскы радіа нелем на інтернеті

Од 1-го апріля дві русиньскы радіа лем фм і русин фм пошырюють своє высыланя і за граніцями інтернету. Радіа підписали договор з кошыцьков фірмов Antik. Радіо лем фм было до портфолія фірмы зараджене в половині марца. Молодше русин фм є офіціално пошырьоване одднесь, 1-го апріля 2015 р. О што властно ходить?

Высыланя радій было придане кліентам фірмы, котры од ньой хоснують IPTV, OTT або мобілну аплікацію про смартфоны. В рамках IPTV фірма Antik покрывать головно выходну і северну часть Словакії – місто Кошыці і навколишні села, Требішов, Сечовці, Воронів над Топльов, Гуменне, Стропків, Попрад, Світ і далшы. В рамках ОТТ є служба фірмы Antik доступна на теріторії цілой Словакії – од Чорной над Тисов аж по Голіч. Єднаке покрытя є і в рамках їх мобілной аплікації Antik TV GO.

Од днешнього дня так можете нашы дві русиньскы радіа слухати і без компютера ці смартфона. Вшыткы клієнты фірмы Antik собі радіа можуть слухати і через свої сет-топ-боксы, ці через свої „розумны“ телевізоры.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА