Уповномочена покликала на стрічу Русинів і Русинів-Українців

Уряд уповномоченого влады Словацькой републікы про народностны меншыны днесь зорґанізовав сполочну робочу стрічу, на котру были покликаны представителі русиньской народностной меншыны і україньской народностной меншыны, котру але заступать Союз Русинів-Українців Словацькой републікы. Стріча проходить в Баньскій Быстріці.

За русиньску народностну меншыну суть участны членове Округлого стола Русинів Словеньска (ОСРС): Андрій Ліґа, председа ОСРС, Мілан Мнягончак, председа Русиньской оброды на Словеньску, Мілан Піліп, член Русиньской оброды на Словеньску і Ян Липиньскый зо Здружіня інтеліґенції Русинів Словеньска. Мнягончак і Липиньскый суть єдночасно і членове Выбору про народностны меншыны. За Українців суть, як вже было спомянуте, участны членове Союзу Русинів- Українців Словацькой републікы.

Ціль робочой стрічі є подля пресовой справы Уряду уповномоченого вести діскузію о одкрытых вопросах взаємных односин тых народностных меншын (значіть русиньской і україньской). Робочой стрічі є участна і сама повірена уповномочена влады Словацькой републікы про народностны меншыны Марія Єдлічкова і Алена Котванова, директорка Канцеларії Уряду уповномоченого влады Словацькой републікы про народностны меншыны.

Днешня стріча была выкликана протестным писмом, котре підпісало сім русиньскый орґанізацій і председа ОСРС. В писмі ся жадало, жебы не были з проґраму Култура народностных меншын підпорованы події, котры робить Союз Русинів-Українців Словацькой републікы, і жебы обще рішыв ся вопрос існованя такой орґанізації. Русины вецераз акцентовали, же не мають проблем з україньсков народностнов меншынов, ани з орґанізаціями, котры суть україньскы. Проблемом є як раз Союз Русинів-Українців і їх події, кідьже доднесь союз не вызнавать русиньску народностну меншыну, не вызнавать русиньскый язык і бісідує о Русинах як о части україньского народа і русиньску културу на своїх подіях презентує як културу україньску.

На Словакії суть як окремы народности вызнаны русиньска і україньска меншыны. Зато зіставать вопросом, кідь хотів Уряд уповномоченого діскутовати о односинах Русинів і Українців, чом знова покликав орґанізацію, котра репрезентує неіснуючу меншыну Русинів-Українців. О резултатах стрічі будеме інформовати.

Петро Медвідь

На фотоґрафії: повірена уповномочена Марія Єдлічкова

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА