Тогорічна едиция конкурсу “Віртуальны гушлі” – выстартувала

Як заявлят орґанізатор, выстартувала тогорічна едиция конкурсу “Віртуальны гушлі” (Wirtu@lne gęśle) на найліпшу фолькову платню з 2014 р., котру спосеред 66 альбомів выберают інтернавты (попри тым, проходит конкурс на найфайнійшу окладинку тых платен).

“Віртуальны гушлі” то конкурс барз шыроко тыкаючий терміну фольк, понеже народна музыка єст лем інспірацийом, джерелом до творіня і перетворіня єй в інчых музычных стилях – традицийном музыком, співаном поезийом, але і в інчых видах музыкы – од клюбовой, через сучасну аж по тяжкы, метальовы звукы.

Спосеред дотеперішніх лавреатів конкурсу сут і такы, котры часто сігают по лемківску народну музыку (Оркєстра св. Миколая, Черемшына) і інчы, знаны в Польщы і світі, ансамблі.

Голосуваня зачало ся 16. марця, а скінчыт 26. квітня 2015 р. і проходит на сайті www.gesle.folk.pl.